Куда-дой фестивалында тыва кудалар
ВДНХ-да “Россия” делегей чергелиг делгелге шөлүнге тыванын аныяктары Денис Сотпа биле Олча Ооржак, Александр Агбаан биле Солаңгы Тамдын шайлалгазын ойнааннар.
Тываларның шаандан тура дамчып келген чаңчылы кудага хойнун ужазын улуг чараш дески кылдыр белеткээш өгленген аныяктарның баарынга делгээш база ол улуг хүндүткелдиг чемни аныяктарның эң улуг назылыг даайы йөрээл сөстерни чугаалавышаан байырлалга келген чонга улей кезип аайлаар. Фестивалга киржиири-биле аныяктарга Кызыл кожууннуң девискээринде мал өстүрүп чоруур арат ажыл-агыйның даргазы Артык Казырыкпай кончуг-даа улуг иртти белекке берген.
Оон ангыда аныяктарга эртенги сагган сүттү, чаа тырткан өремени Тываның арат ажыл-агыйлыг малчыннары белекке берген. Ол сүттерден улаштыр шөйген быштакты кылгаш, оремени саржаг биле чөкпек кылдыр хайындырып берген.
Төрээн Тывавыстың Төөгүзүнге артып каар кылдыр чараш делегей чергелиг делгелге шөлүнге тыва кудага белектерни соңнээн араттарывыска Каа-Хем кожуунда Мая Одушпай, Лариса Монгушка, Танды кожуунда Лойгу Юбилианга, Бии-Хем кожуунда Чамзы Нелли болгаш Кызыл кожуунда Данзырын Дары-Сууга черге чедир мөгейип, өөрүп четтирбишаан, ажыл-ижинге хөй-хөй чедиишкиннерни күзедивис!
