Улуг-Хем кожуун чагыргазының коллегия хуралынга көдээ ажыл-агый адырында эдериштирилге кампаниязынга хамаарыштыр кылып чоруткан ажылдың дугайында айтырыгны көрген.
Октябрь 1-ниң байдалы-биле кожууннуң арат-фермер ажыл-агыйларында, хуу ажыл-агыйлыгларда ниитизи-биле төрүүр 36962 шээр (12590 - өшкү, 24372 хой) мал бар. Эрткен чылга деңнээрге, төрүүр шээр малдың өзүлдези 339 баш өскен.
Кошкарлар саны 487, хуналар - 252, бугалар - 133, аскыр малдар - 233 баш бар. Көдээ ажыл-агый эргелелиниң кол зоотехнигиниң саналы-биле, бүдүрүкчү шээр малдың баш саны төрүүр шээр малдың баш санынга четчип турар: 1 кошкар 40-50 баш хойну эдерип каап болур. Октябрь, ноябрь айларында эдериштирип алырга, чылый бергенде, март-апрель айларда мал оолдап, төрээн малдар үнүп орар оътка, чаш төл чылыгга доругуп өзерде-даа эки.
Малдың баш-санын өстүрүп алыйн дээр болза: эдериштирилгезинден эгелээш, кышкы мал чемин чедиштир берип, кажаазын чылыглап, мал оолдаашкынын кызымаккай эрттирип, кокайлардан камгалап, кезээде мал кададын ээн кагбайн чоруур эрес-кежээ малчыннар 100 хойдан 100 ажыг мал төлүн камгалап, өстүрүп алыр аргалыг болурун кол агроном чугаалаан.
