🚜 ЧАСКЫ ТАРЫЛГАГА БЕЛЕТКЕЛ
🚜 ЧАСКЫ ТАРЫЛГАГА БЕЛЕТКЕЛ
Улуг-Хем кожууннуң көдээ ажыл-агый эргелелиниң даргазы Болат Ховалыг кожууннуң араттары-биле ужуражып, часкы тарылга дугайында чугаалашкан.
Ногаа тарып турар «Усма» көдээ ажыл-агый бүдүрүлгезиниң шөлү «Торгалыг» көдээ ажыл-агыйының тараа тарып турар шөлү-биле кожа чыдар, суггаттыг, чемишчидилгелиг, кончуг эки кара хөрзүннүг чер бооп турар.
«Усма» көдээ ажыл-агый бүдүрүлгезиниң даргазы Радомир Сат бо чылын картошкадан аңгыда ногааны көвүдедир тарыыр планныг.
Ол шөлүнүң чартыынга капуста, морковь, свекла тарыыр деп көдээ ажыл-агый эргелелиниң даргазы-биле сүмелешкен. Чүгле ногаа тарыырда үрезин чаштырар тускай агрегат херек.
Агрегатты лизинг-биле садыглажыр дугайында чугаалашканнар. «Торгалыг» көдээ ажыл-агыйының баштыңы Олег Домбааның шөлүнүң кезик чамдыызынга база ногаа тарыыр кылдыр дугурушканнар.
Чаатыда арат ажыл-агыйлыг Чойган Сундуй Красноярск крайның Минусинск районунда «Ничкинское» кызыгаарлыг харыысалгалыг ниитилел-биле тараа үрезинин садып алыр дугайында керээни чарып алган. Оон ыңай Чойган чаа комбайнны лизинг-биле садып алыр дугайында Болат Каң-оолович-биле сүмелешкен.
